ភ្ញៀវទេសចរ កើនឡើង ១៨% នៅឆ្នាំ២០០៧
សម្បត្តិ ធនធាន និងសម្បត្តិមរតកវប្បធម៌ បានទាក់ទាញភ្ញៀវទេសចរពីគ្រប់មជ្ឈដ្ឋានឲ្យមកទស្សនាប្រទេសកម្ពុជា កាន់តែច្រើន ហើយវិស័យនេះបាន និងកំពុងនាំមុខគេក្នុងការអភិវឌ្ឍន៍សេដ្ឋកិច្ចជាតិ។ ភាពជោគជ័យទាំងនេះ បណ្ដាលមកពីកត្តាជាច្រើនដូចជា ប្រាង្គប្រាសាទ រមណីយដ្ឋាន សមុទ្រ នយោបាយ សន្តិសុខ ប្រព័ន្ធគមនាគមន៍ សេវាកម្មផ្ទះសំណាក់។ កាលពីឆ្នាំ ២០០៧ កន្លងមក ភ្ញៀវទេសចរបានកើនឡើងជិត ២លាននាក់ ហើយនៅឆ្នាំ ២០០៨នេះ គេរំពឹងថា ភ្ញៀវទេសចរនឹងមកទស្សនាប្រទេសកម្ពុជាមានការកើនឡើង ២,៤លាននាក់។
វិស័យទេសចរណ៍ ជាឧស្សាហកម្មគ្មានផ្សែងមួយប្រភេទ ដែលបានរួមចំណែកក្នុងការអភិវឌ្ឍប្រទេសកម្ពុជាឲ្យមានការរីកចម្រើន ហើយបានទាក់ទាញមនុស្សគ្រប់ជាតិសាសន៍ឲ្យមកទស្សនាជាហូរហែជារៀងរាល់ ថ្ងៃ។
នៅឆ្នាំ ២០០៧ កន្លងមកនេះ បើតាមមន្ត្រីជំនាញនៃក្រសួងទេសចរណ៍បានអះអាងថា មានភ្ញៀវទេសចរប្រមាណជិត ២លាននាក់ ដែលមកទស្សនាក្នុងប្រទេសកម្ពុជា ហើយខេត្ត - ក្រុង ដែលមានភ្ញៀវទៅទស្សនាច្រើនជាងគេ គឺក្រុងភ្នំពេញ ខេត្តសៀមរាប និងក្រុងព្រះសីហនុ។ តាមរយៈភ្ញៀវទេសចរទាំងនេះ បានជួយឲ្យប្រជាពលរដ្ឋដែលរស់នៅតំបន់ទេសចរណ៍មានការងារធ្វើអាចរក ប្រាក់ចំណូលសម្រាប់គ្រប់គ្រងគ្រួសារកាន់តែប្រសើរ និងរួមចំណែកកាត់បន្ថយភាពក្រីក្រដល់ប្រជាពលរដ្ឋថែមទៀតផង។
តំបន់ទេសចរណ៍សំខាន់ៗ
កម្ពុជាសម្បូរទៅដោយសក្ដានុពលវប្បធម៌ ធនធានធម្មជាតិ ប្រាង្គប្រាសាទពាសពេញផ្ទៃប្រទេស រមណីយដ្ឋានសមុទ្របឹងបួ ព្រៃភ្នំក្រំថ្ម ជាពិសេស ប្រាសាទអង្គរវត្តដ៏ល្បីល្បាញដែលជាសម្បត្តិអច្ឆរិយនៅលើពិភពលោក ក្នុងការទាក់ទាញភ្ញៀវទេសចរ។
បើតាមឯកសាររបស់លោក យ៉ង វ៉ន ប្រធាននាយកដ្ឋានឧស្សាហកម្មទេសចរណ៍នៃក្រសួងទេសចរណ៍បានបញ្ជាក់ថា "តំបន់ទេសចរណ៍សំខាន់ៗចំនួន ១៣១២កន្លែង រមណីយដ្ឋានធម្មជាតិមាន ១០២កន្លែង រមណីយដ្ឋានប្រវត្តិសាស្ត្រ ១២៦៩កន្លែង រមណីយដ្ឋានកែច្នៃ ៤១កន្លែង និងរមណីយដ្ឋាន ដែលទើបរកឃើញមិនទាន់រាប់បញ្ចូលមួយចំនួនទៀត"។
ក្រៅពីបញ្ហានេះ វិស័យទេសចរណ៍ក៏មានការរួមចំណែកពីកត្តាជាច្រើនទៀតដូចជា ប្រព័ន្ធគមនាគមន៍ផ្លូវគោក ទឹក និងអាកាស មានការងាយស្រួលដល់ភ្ញៀវទេសចរ។ ចំណែកឯចំនួនសណ្ឋាគារ ផ្ទះសំណាក់ អាហារដ្ឋាន មានព្រោងព្រាតពាសពេញផ្ទៃប្រទេស មានតម្លៃសមរម្យសម្រាប់បម្រើតាមសេចក្ដីត្រូវការរបស់ភ្ញៀវមិនឲ្យ ទាស់ចិត្តឡើយ។
បើតាមឯកសាររបស់លោក យ៉ង វ៉ន បញ្ជាក់ថាការដែលភ្ញៀវទេសចរមកទស្សនាកម្ពុជាច្រើននោះ មានកត្តាជាចម្បងផ្សេងទៀតដូចជា ចំនួនភ្នាក់ងារទេសចរទាំងក្រុមហ៊ុនជាតិ និងអន្តរជាតិអ្នកមគ្គុទ្ទេសក៏ទេសចរមានការកើនឡើង និងច្រកទ្វារអន្តរជាតិភ្នំពេញ អាកាសយានដ្ឋានខេត្តសៀមរាប កំពុងផែអន្តរជាតិក្រុងព្រះសីហនុ។ ជាពិសេស នៅតាមព្រំដែនជាប់ប្រទេសជិតខាង ក៏មានបើកច្រកឲ្យភ្ញៀវឆ្លងកាត់ដែរ ខេត្តស្វាយរៀង (បាវិត) កណ្ដាល ព្រៃវែង (ក្អមសំណ និងកោះរកា) ខេត្តកោះកុង (ចាំយាម) បន្ទាយមានជ័យ (ប៉ោយប៉ែត) ឧត្តរមានជ័យ(អូរស្មាច់ និងជាំ) និងខេត្តព្រះវិហារ (ជាំក្សាន្ត)…។
ការដែលភ្ញៀវទេសចរចម្រុះជាតិតែច្រើននោះ ត្រូវបានលោក មឿន សុន ប្រសាសន៍ថា បណ្ដាលមកពីកត្តា២យ៉ាង គឺទី១ ប្រទេសខ្មែរមានប្រាសាទច្រើនខុសប្លែកពីគេដែលប្រទេសដទៃគ្មាន ជាពិសេសនៅខេត្តសៀមរាប។ ទី២ ជនជាតិខ្មែរ មានវប្បធម៌ពិសេសខុសប្លែកពីគេ ដែលអាចទាក់ទាញឲ្យអ្នកទេសចរមកទស្សនាស្រុកយើង។ ម្យ៉ាងទៀតកំណើនភ្ញៀវទេសចរនេះបណ្ដាលមកពីនយោបាយរបស់រាជរដ្ឋាភិបាល ល្អលើគ្រប់វិស័យ មានសន្តិសុខល្អបង្កលក្ខណៈដល់ភ្ញៀវក្នុងដំណើរកម្សាន្ត។
ភ្ញៀវទេសចរកូរ៉េខាងត្បូងជាប់លំដាប់លេខ១
បើតាមប្រសាសន៍លោក ថោង ខុន រដ្ឋមន្ត្រីក្រសួងទេសចរណ៍ ភ្ញៀវពីតំបន់អាស៊ីមកទស្សនាកម្ពុជាមានប្រមាណ ៦០% អឺរ៉ុបជាង២០% អាមេរិក ១៨% និងមកពីតំបន់ផ្សេងៗមួយចំនួនទៀត។
ទន្ទឹមនឹងការមកដល់នូវចំនួនទេសចរបរទេសគ្រប់ជាតិសាសន៍នៅ កម្ពុជា ភ្ញៀវមកពីកូរ៉េខាងត្បូងនៅតែរក្សាទីតាំងជួរមុខគេ។ យោងតាមរបាយការណ៍របស់ក្រសួងទេសចរណ៍ នៅឆ្នាំ២០០៧នេះជនជាតិកូរ៉េខាងត្បូង មានចំនួនជិត ៣០០ ០០០នាក់បានមកទស្សនា នៅកម្ពុជាដែលតាងឲ្យ ១៧% នៃចំនួនទេសចរបរទេសសរុប។ ខណៈដែលជនជាតិជប៉ុនឈរនៅលំដាប់ទីពីរ មានប្រហែល ១៦២ ០០០នាក់ចំណែកឯជនជាតិអាមេរិកមកទស្សនាកម្ពុជាមានចំនួនជិត ១៣៨ ០០០នាក់។
លោក មឿង សុន កត់សម្គាល់ឃើញការដែលភ្ញៀវជនជាតិកូរ៉េ មកទស្សនាប្រទេសយើងច្រើនជាងគេ ក៏ព្រោះតែប្រទេសយើងទាំងពីរមាននយោបាយល្អ សេដ្ឋកិច្ចប្រទេសគេខ្ពស់ ធ្វើឲ្យប្រជាជនគេមានលទ្ធភាពមកលេងកម្ពុជា។ ជាពិសេសអ្នកពាណិជ្ជករកូរ៉េខាងត្បូង មករកស៊ីនៅស្រុកខ្មែរច្រើន ហើយបានធ្វើការអូសទាញជនជាតិរបស់គេទស្សនាស្រុកខ្មែរកាន់តែ ច្រើនជារៀងរាល់ឆ្នាំ។
ភ្ញៀវទេសចរដែលមកលេងស្រុកខ្មែរភាគច្រើនចាប់ពីខែ តុលា ដល់ខែឧសភា ព្រោះក្នុងអំឡុងពេលនោះអាកាសធាតុល្អមិនមានបង្កការលំបាកដល់អ្នក ដំណើរ។ ដោយឡែកនៅខេត្តសៀមរាប ដែលជាតំបន់ប្រជុំប្រាសាទបុរាណដ៏ល្បាញល្បីក្នុងនោះប្រាសាទ អង្គរវត្តជាសម្បត្តិបេតិកភណ្ឌពិភពលោកមានភ្ញៀវទៅទស្សនាច្រើនជាង គេ។ (អានបន្ថែម)
